სიახლეები
ევროპის საგანგებო ნომრის ასოციაციამ „112“ საუკეთესო ოპერატორის ნომინაციაზე წარადგინა
2013-10-08 11:11:17
ევროპის საგანგებო ნომრის ასოციაციამ „112“ საუკეთესო ოპერატორის ნომინაციაზე წარადგინა

შინაგან საქმეთა სამინისტროს „112“-ის დეპარტამენტი ევროპის საგანგებო ნომრის ასოციაციის (EENA) მიერ, 2014 წლის „112“-ის დაჯილდოების ცერემონიალზე, საუკეთესო ოპერატორის/დისპეტჩერის კატეგორიაზეა ნომინირებული. საქართველო, როგორც საუკეთესო კანდიდატი აღნიშნული ნომინაციისთვის, პოლონეთთან ერთად,  EENA-ს მრჩეველთა საბჭოს მიერ იქნა შერჩეული, რომელშიც ასოციაციის წევრი 44 ქვეყანა იღებდა მონაწილეობას.

 

2013 წლის 13 ოქტომბრამდე მიმდინარეობს ასოციაციის წევრი ქვეყნების მიერ ხმის მიცემის პროცედურა, რომლის დასრულების შემდეგ ნომინირებულ კანდიდატებს შორის საბოლოო გამარჯვებული გამოვლინდება.


„112“-ის ყოველწლიური დაჯილდოების ცერემონიალი 2014 წლის 2 აპრილს, პოლონეთში ქ. ვარშავაში გაიმართება.  ევროპის საგანგებო ნომრის ასოციაცია სხვადასხვა ქვეყნის მოქალაქეებს, დისპეტჩერებსა და საგანგებო სიტუაციების მართვის ცენტრებს განსაკუთრებული მიღწევებისათვის დააჯილდოვებს.

 

     

 

საქართველოს  შინაგან საქმეთა სამინისტროს „112“-ის წარმომადგენლობა EENA-ს ოფიციალური და სრულუფლებიანი წევრი 2013 წლის 3 სექტემბერს გახდა.

 

ევროპის საგანგებო ნომრის ასოციაცია (EENA) საერთაშორისო არასამთავრობო ორგანიზაციაა, რომელიც 1999 წელს შეიქმნა ბრიუსელში. ასოციაციის მიზანია, ევროპის მასშტაბით გადაუდებელი დახმარების  ერთიანი  ნომრის - „112“ -ის დანერგვა და საგანგებო სიტუაციების მართვის სამსახურების ეფექტური მუშაობა და მათთვის მაღალი ხარისხის გადაუდებელი დახმარების სერვისის განვითარების ხელშეწყობა.


EENA  აერთიანებს ევროპის 850 გადაუდებელი დახმარების სფეროს წარმომადგენელს, 9 საერთაშორისო ასოციაციას,  ევროპარლამენტის 130 წევრს და 50  მკვლევარს.