112-ზე უნდა დარეკო მხოლოდ მაშინ, თუ გადაუდებელი შემთხვევაა. გადაუდებელი შემთხვევა გულისხმობს, ნებისმიერ სიტუაციას, როდესაც შემდეგი საგანგებო სამსახურების დახმარებაა საჭირო:

• პოლიცია
• სახანძრო / სამაშველო სამსახური
• სასწრაფო სამედიცინო დახმარება

ზარის განხორციელებისას მოქალაქემ ოპერატორს უნდა მიაწოდოს შემდეგი ინფორმაცია:

• სად მოხდა – შემთხვევის ზუსტი ადგილი
• რა მოხდა – შემთხვევის აღწერა და ინფორმაცია იმის შესახებ, თუ რომელი გადაუდებელი სამსახურის დახმარებაა საჭირო
• ზარის ინიციატორის სახელი და გვარი

აღნიშნული ინფორმაცია ძალიან მნიშვნელოვანია „112“-ის ოპერატორისთვის, რათა მან შეძლოს საჭირო და დროული დახმარების აღმოჩენა.

 გახსოვდეს!

• ისაუბრე გარკვევით და სანამ ოპერატორი არ დაასრულებს საუბარს, არ გათიშო ტელეფონი! 
• ყოველი შემოსული ზარი იწერება!

112 არის საქართველოში მოქმედი გადაუდებელი დახმარების ერთიანი ნომერი, რომელიც 2012 წელს საგანგებო სიტუაციების მართვის ეფექტიანი სისტემის ჩამოყალიბების მიზნით შეიქმნა.

112-ის ოპერატორ-დისპეტჩერები, 24 საათის განმავლობაში, საქართველოს სხვადასხვა წერტილიდან იღებენ გადაუდებელი დახმარების საჭიროების შესახებ შეტყობინებებს და ოპერატიულად გადასცემენ შესაბამის სამსახურებს. 112-ის ოპერატორები წარმოადგენენ ერთადერთ დამაკავშირებელ ხიდს ყველაზე მძიმე წუთებში მყოფ ადამიანებსა და საგანგებო სამსახურებს შორის.